3000km und mehr
Von Görlitz nach Santiago de Compostela
Himmu so stahlblau schön
d'Sunne ir Mitti so häu
möcht drinne touche
möcht drinne schwümme
Himmu ufem Wäg
ändlos wiet u klar
möcht drinne touche
möcht drinne schwümme
Dr Horizont chli miuchig
Häu u chli schliergig
Dr Wind blast stärcher
Blätter wirblets umenang
Es chömme Wulche immer meh
grösser u grösser zieh si uf
wärde dunkler u schwärzer
Blitz u Donner i dr Färni
Die erschte Tropfe uf dr Huut
chüehlend u agnähm
Aber itz wirds meh und meh
Langsam wird aues nass
Zum Glück unger Dach
äs schüttet u schüttet
Isch fischter u schwarz
äs chlepft u blitzt wie wild
Ganz wiet wäg am Horizont
äs Liecht, ä Öffnig im Himmu
Zum Glück wie jedesmau
häu u schön, ä Sunnestrau
Himmu so stahlblau schön
d'Sunne ir Mitti so häu
möcht drinne touche
möcht drinne schwümme
Himmu ufem Wäg
ändlos wiet u klar
möcht drinne touche
möcht drinne schwümme